Турганбаев: кышында электр энергия тартыштыгы болбойт
Жазылуу
"Электр станциялары" ААКтын техникалык директору Руслан Турганбаев кышка карата энергетика тармагы даяр экенин белгиледи.
Кышында электр энергия тартыштыгы болбойт. Аны алдын алуу үчүн тийиштүү аракеттер көрүлүүдө. Бул тууралуу Руслан Турганбаев Sputnik Кыргызстан радиосуна маек куруп жатып билдирди.
Турганбаев: кышында электр энергия тартыштыгы болбойт
Жетекчинин айтымында, быйыл Токтогул суу сактагычында былтыркыга салыштырмалуу көбүрөөк суу топтолгон.
"Кышка карата быйыл абал өткөн жылга салыштырмалуу жакшы. Анткени былтыр Токтогул ГЭСинде суунун көлөмү 12,1 миллиард куб мерт болсо, быйыл 13,6 миллиард куб метрге жетти. Бул кыштан чыгууга жетишсиз. Ошондуктан кошуна мамлекеттер менен келишимдер түзүлүп, анын негизинде электр энергия импорттолууда. Бул кыштан тартыштык болбой чыгууга өбөлгө түзөт. Жыл сайын электр энергияны колдонуучулардын саны беш пайызга өсүүсү божомолдонгон. Ошону эске алуу менен генерация пландаштырылат. Маселен, быйыл Токтогул ГЭСинде реконструкция бүткөнү турат. Төртүнчү агрегат ишке кирсе 60 мегаватт кошулуп, электр энергияны иштеп чыгуу 20 пайызга өсөт. Учурда сыноо иштери жүргүзүлүүдө. План боюнча ноябрдын этеги менен ишке кирет. Мындан тышкары, Ат-Башы ГЭСинде төрт агрегат тең реконструкцияланды. Натыйжада 4,8 мегаватт кубаттуулук кошулду", — деди Турганбаев.
Ошондой эле ал кайра калыбына келүүчү булактардан энергия алуу жаатында да иштер жүрүп жатканын кошумчалады.
