Үркүнчиев: Бишкекте жыл башынан бери мыйзамсыз 2 831 объект бузулду
© Sputnik / Асель Сыдыкова
Жазылуу
Бишкек мэриясынын көрктөндүрүү жана жер пайдаланууну контролдоо боюнча муниципалдык инспекциясынын башчысынын орун басары Тилек Үркүнчиев аталган инспекциянын январь-август айларында жасаган иштери тууралуу айтып берди.
Бишкек мэриясынын көрктөндүрүүнү жана жер пайдаланууну контролдоо боюнча муниципалдык инспекциясы шаардын экологиялык абалын жакшыртуу максатында дөңгөлөк, каучук, синтетикалык калдыктардын жана экологияга зыян келтирүүчү тыюу салынган заттардын өрттөлүп кетпеши үчүн 321 чарба субъектилерин (мончо, сауна, жеке чарбаларды) текшерип, тыюу салынган буюмдарды өрттөө фактысы боюнча 16 протокол түздү. Жыйынтыгында жалпы суммасы 244 миң сомдук айып пул өндүрүлгөн. Бул тууралуу Тилек Үркүнчиев Sputnik Кыргызстан радиосунун эфиринде маек куруп жатып билдирди.
Үркүнчиев: Бишкекте жыл башынан бери мыйзамсыз 2 831 объект бузулду
Анын айтымында, инспекция президенттин "2022-жылды Тоолордун экосистемасын коргоо жана климаттык туруктуулук жылы деп жарыялоо жөнүндө" жарлыгына ылайык Кыргызстан боюнча 17-сентябрдан 31-октябрга чейин ишембиликтерди өткөрөт.
"Муниципалдык инспекция 1-сентябрга карата 8 700 чарба жүргүзүүчү субъектилерди, ишканаларды, уюм жана жеке чарбаларды текшерип 77 жазма буйрук берген. Ошондой эле муниципалдык инспекциянын кызмат адамдарынын көмөгү менен катуу тиричилик таштандыларын чыгаруу жана көмүү боюнча кызмат көрсөтүүгө жалпы 398 миң сомдук келишимдер түзүлдү. Жерди пайдаланууну контролдоо боюнча муниципалдык инспекция январь-август айларында 2 831 объектини бузуп, 1 227 жеңил типтеги объектилерди алды (анын ичинен 24 объект жолдор боюнча). Капиталдык курулуш боюнча (кошумча курулуштар, тосмолор, пайдубалдар) 88 жана 1 516 жарнамалык конструкцияларды жок кылды. Бишкек шаарын көрктөндүрүүнүн жана жер пайдалануунун эрежелери боюнча аныкталган эреже бузуулар үчүн жалпы суммасы 6 336 500 сомдук укук бузуулар боюнча 777 протоколдор түзүлдү. Ошондой эле муниципалитеттин менчигиндеги жер тилкелерине укук берүү боюнча комиссиянын отурумунда жер тилкесин пайдалануу укугун узартуу маселесин кароо үчүн жеринде 394 акт түзүлдү", — деди Үркүнчиев.
Ал аталган инспекция шаардагы тышкы көрктөндүрүү жана айлана-чөйрөнү коргоо, анын сакталышын көзөмөлдөө максатында бишкектиктер арасында түшүндүрүү иштерин үзгүлтүксүз жүргүзүп жатканын кошумчалады.
