Абдраев: аралыктан кызмат көрсөтүү насыя алууну жеңилдетет
10:14 14.12.2021 (Жаңыртылды: 15:35 14.12.2021)
Жазылуу
Кыргызстандын банктар союзунун президенти Анвар Абдраев банктар, финансылык кызматтарды аралыктан көрсөтүү үчүн FinMarket платформасы иштелип чыгып жатканын белгиледи.
Банк секторун санариптештирүү аркылуу элге ыңгайлуулук түзүү мерчемделүүдө. Бул тууралуу Анвар Абдраев Sputnik Кыргызстан радиосунда маек куруп жатып билдирди.
Абдраев: аралыктан кызмат көрсөтүү насыя алууну жеңилдетет
Анын айтымында, аталган долбоор иштеп баштаса жарандар көптөгөн документтерди чогултуп убара болбойт.
"Санарип кол тамганы "Инфоком" мамлекеттик ишканасы ишке ашырууда. Мындан тышкары, Улуттук банк дагы өзүнүн санарип кол тамгасын даярдап жатат. Банктар финансылык кызматтарды аралыктан көрсөткөн FinMarket платформасына киргизүү мерчемделүүдө. Бул платформа толук кандуу иштеп баштаса элге жеңил болот. Себеби бардык банктык кызматтарды онлайн эле ишке ашырууга мүмкүндүк жаралат. Мисалы, учурда юридикалык фирманын эсебин жабуу үчүн 23 банктан маалым кат алуу керек. Ал эми бул платформа менен тийиштүү тактаманы бир канча мүнөттө алууга шарт түзүлөт. Насыя алуу кыйла жеңилдейт. Алыскы айылдагылар насыя алуу үчүн райондук борборго чейин барып, ар кандай татаалдыктар жаралууда. Мунун баарын аралыктан жасоого мүмкүн болот. Мындан тышкары, банктар арасындагы атаандаштыкты күчөтүп, насыянын пайыздарын азайтууга да түрткү болушу ыктымал. Анткени бир платформада бардык банктардын кызматтары тизмектелет. Жарандар ошол тизмеден карап салыштыра алат. Албетте, алар эң ыңгайлуусун тандайт, демек, банк жетекчилиги кардарларды жоготпоо үчүн башкалар менен атаандашууга мажбур болот. Мындан тышкары, аралыктан кызмат көрсөтүүдө инфраструктураны, кызматкерлерди тейлөө жокко чыгат. Эгер операциялык чыгымдар азайса, бул дагы кызмат көрсөтүүнүн арзандашына алып келиши мүмкүн", — деди Абдраев.
Ал аталган платформа менен накталай эмес төлөмгө өтүү тездей турганын боолголоду.
