Жогорку Кеңешке шайлоонун электрондук урна санаган жыйынтыгын БШК жарыялады. Бул маалыматтарга таянуу менен Sputnik Кыргызстан агенттиги Жогорку Кеңештин жаңы чакырылышына кимдер депутат болуп келерин божомолдоду. Белгилей кетсек, инфографикада көрсөтүлгөн маалыматтар шайлоонун расмий жыйынтыгы болуп эсептелбейт. Кол менен саналган акыркы жыйынтыкты БШК аныктайт.
2021-жылкы парламенттик шайлоо жаңы система менен өтүп жатат. 54 талапкер партиялык тизме (пропорционалдык система) менен, 36сы бир мандаттуу округдан (мажоритардык система) шайланат. Жогорку Кеңештен орун алуу үчүн 21 партия ат салышты:
Мыйзамга ылайык, парламентке республика боюнча шайлоого катышкандардын добушунун 5 пайызынан, ар бир облустагы (Бишкек жана Ош шаары дагы кирет) шайлоочулардын добушунун 0,5 пайызынан жогору алгандар өтөт.
Жогорку Кеңешке орундар эки босогодон тең өткөн партиялар арасында бөлүштүрүлөт. Шайлоонун жыйынтыгы боюнча бир партияга 27ден ашык орун берилбейт.
Маанилүү: бул ирет шайлоодо жарандар бир партияга гана эмес, андагы бир талапкерге дагы добуш бере алды. Партия алган мандаттар талапкерлердин топтогон добушуна жараша жана гендердик теңчиликти сактоо менен бөлүштүрүлөт.
Бир мандаттуу округ боюнча шайлоону өткөрүү үчүн Кыргызстан 36 округга бөлүнгөн. Анын ар бирине бирден депутат шайланат. Башында бир мандаттуу округ боюнча 320 жаран талапкерлигин коюуга арыз берген. Бирок алардын бир бөлүгү кийин жарышка катышуудан баш тартып койгон.
Борбордук шайлоо комиссиясы АСУнун эсеби боюнча шайлоонун алдын ала жыйынтыгын жарыялагандан кийин колго саналган добуштардын дагы алдын ала жыйынтыгы боюнча маалымат берет.
2020-жылдын октябрь окуяларынан кийин БШК парламенттик шайлоонун жыйынтыгын жокко чыгарган. Буга байланыштуу быйыл Жогорку Кеңешке шайлоо кайрадан өттү.
