Эргешов: үй-бүлө институтун чыңдоочу борбор түзүлдү
12:19 09.11.2021 (Жаңыртылды: 14:27 14.12.2021)
© Sputnik / Асель Акматалиева
Жазылуу
"Бакыт ордосу" үй-бүлөнү чыңдоо борборунун түзүүчүсү жана жетекчиси Акимжан Эргешов аталган мекемеде ар багыттагы адистер иштей турганын айтты.
Аталган борбордун түзүлгөнүнө бир жылга чукулдап калды. Максаты — үй-бүлө институтун бекемдөө. Бул тууралуу Акимжан Эргешов Sputnik Кыргызстан радиосунда маек куруп жатып билдирди.
Эргешов: үй-бүлө институтун чыңдоочу борбор түзүлдү
Анын айтымында, аталган борборго бардык каалоочулар кайрылса болот.
"Мамлекеттик статистика комитетинин берген маалыматтарына таянсак, соңку беш жылда ажырашуулардын саны көбөйүп баратат. Сиздердин пресс-борбордо өткөрүлгөн конференция учурунда да өлкөдө төрөлгөн балдардын 49 пайызынын документинде атасы ким экени көрсөтүлбөгөнү айтылды. Бул абдан коркунучтуу көрүнүш. Мындан бир топ жыл мурда Батышта ташталган балдар өкмөткө келип алып үй, автоунаа же башка бир материалдык байлыктарды эмес, аларды таштап кеткен ата-энелерин таап берүүнү талап кылган макалаларды таң калуу менен окуйт элек. Тилекке каршы, биз дагы ошондой абалга бара жатабыз. Бирок көйгөйдү азыртадан баштап ооздуктоого мүмкүнчүлүк бар. Ошондуктан коомдук башталгычтагы "Бакыт ордо" борбору ачылды. Мында чоңдор жана балдар психологдору, этнотарбияны мыкты билген адистер, сексолог, гинеколог, уролог жана диний ишмерлер бирдикте комплекстүү кызмат көрсөтүшөт. Алар 16 саатка баткан бир курстук сабактарды иштеп чыгышкан. Кайрылган адамдар мына ушул окутуудан өтүшөт. Келечекте келин болчу кыздар, күйөө болчу жигиттер, кайненелер, кайнаталар менен иш алып барабыз. Аларды даярдоо курсунан өткөрөбүз. Ошондой эле кризистик абалга туш болгон үй-бүлөлөр да кайрылса болот, — деди Эргешов.
Ал даярдоо курстарына азырынча ар ким көңүлүнөн чыккан каражатты төлөп жатканын жана убакыт-сааты кайрылган адамга ылайыкташтырылып пландала турганын кошумчалады.
