БИШКЕК, 30-сен. — Sputnik. Жогорку Кеңештин депутаты Самат Ибраевдин 29 жаштагы уулу Данияр Ибраев дагы деле мамлекет аралык издөөдө. Бул тууралуу Бишкек шаардык ички иштер башкы башкармалыгынын маалымат кызматынан кабарлады.
Экстрадиция боюнча маселени чечүү үчүн материалдар Башкы прокуратурага берилген.
2020-жылдын сентябрынын башында шаардык ички иштер башкы башкармалыгына бир нече курулуш фирмалар кайрылып, Данияр Ибраев ири суммадагы акча алгандыгын айтышкан. Милициянын маалыматына караганда, "Строймир" ЖЧКсынын башкы директору 2018-жылдын декабрынан 2019-жылга чейин курулуш арматураларын алып келип берүүнү убада кылып, жети жабырлануучудан алдап акча алган. Жалпы чыгымдын суммасы 507 миллион 352 миң 49 сомду түзгөн.
Бардык эпизоддор боюнча Жазык кодексинин 204-беренесинин 3-бөлүгүнүн негизинде ("Алдамчылык. Өзгөчө ири өлчөмдө жасалган жосундар") сотко чейинки өндүрүш иштери башталган.
26-декабрда ошол эле шектүү мамлекет, анын ичинен Интерпол аркылуу издөөгө алынган. Ал эми 2020-жылдын февраль айында Ибраевди Болгариянын бийлиги София шаарында кармаганы кабарланган.
