БИШКЕК, 27-авг. — Sputnik. Президент Садыр Жапаров казакстандык кесиптеши Касым-Жомарт Токаевге аскер бөлүгүндөгү жардыруудан каза болгондорго байланыштуу көнүл айтты. Бул тууралуу өлкө башчынын маалымат кызматынан кабарлашты.
"Бул суук кабарды терең кайгыруу менен кабыл алдым. Кыргыз элинин жана жеке өзүмдүн атымдан каза болгондордун үй-бүлөсү менен жакындарына көңүл айтам. Бул каргашалуу окуянын кесепетинен жапа чеккендердин баарына тезирээк сакайып кетүүнү каалайм. Орду толгус жоготуунун аза кайгысын тең бөлүшөбүз", — деп айтылат көңүл айтуу телеграммасында.
Эске салсак, Жамбыл облусундагы аскер бөлүктүн аймагында 26-августта кечки саат тогуздарда өрт чыгып, бир нече жарылуу болгон. Кесепетинде беш киши каза болуп, 90дой адам жаракат алган. Бийлик жарылуу болгон аймакка жакын жердеги айылдардын тургундарын коопсуз жайга көчүрдү.
