БИШКЕК, 20-авг. — Sputnik. Коронавирус менен ооругандын бардыгы, ɵзгɵчɵ орточо жана оор формасына кабылгандар ден соолугун толук калыбына келтирүүсү абзел. Бул тууралуу брифингде Кыргыз курортология жана калыбына келтирип дарылоо илим-изилдɵɵ институтунун башкы дарыгери Акбарали Махмадиев билдирди.
Ал организмди жана органдардын функциясын калыбына келтирип, адамды кадимки жашоого кайтарып, майыптыктын ар кандай түрүн алдын алуу үчүн реабилитациядан өтүү сунушталарын белгилеген.
"Бейтаптын жалпы абалы жакшыргандан кийин комплекстүү реабилитацияны баштоо керек. Буга мультидисциплинардык команда, башкача айтканда, дарыгер, физиотерапевт, психолог жана атайын программа боюнча ден соолук көнүгүүсүн жасаткан адис киришкен жакшы", — деген врач.
Мындан сырткары, ооруп айыккандарга кеңештер берилди:
- дем алуу гимнастикасы сунушталат, ал дем алуу органдарынын калыптанышына жана канды кислород менен байытууга жардам берет;
- илдеттен айыккандан кийин алгачкы күндɵрү аз-аздан жай басып, активдүү болуу зарыл. Таза абада жарым саат басыңыз;
- тамактанууга да көңүл буруп таза суу, компот, морс, сүт азыктары сыяктуу суусундуктарды ичиңиз. Тамактануу ар түрлүү болуп рациондо белок, май, углевод, ошондой эле витаминдер, минералдар камтылышы керек;
- куурулган, туздуу, өтө ачуу, таттуу тамактарды жана шекери көп суусундуктарды ичпеңиз;
- тамеки тартуудан жана спирт ичимдиктерин ичүүдɵн баш тартуу зарыл;
- иммунитетти толук бекемдөө жана моралдык-психологиялык абалды жакшыртуу үчүн уйкуну кандырып, кыймылда болуп, жаман адаттардан алыс болуу зарыл.
