Республика боюнча импорттолгон тирүү мал жандыктары үчүн төрт карантиндик станция ишке кирди. Сырттан кирген мал ал жерде 2-5 күн кармалат. Бул тууралуу Илич Марсбек уулу Sputnik Кыргызстан радиосунда маек куруп жатып билдирди.
Марсбек уулу: эми импорттолгон мал карантиндик зонада кармалат
Анын айтымында, аталган жерлерде мал ылаңы текшерилип, кан алынып, идентификациядан өтөт.
"Кыргызстанга кирген малдын дээрлик бардыгы Россия жана Казакстандан алып келингендиктен кыргыз-казак чек арасына төрт карантиндик станция ачылды. Анын ичинен Чүй облусунун Панфилов карантиндик станциясы 800 баш малга, Сокулук жана Ысык-Ата станциялары 600, ал эми Талас карантиндик станциясы 300 башка ылайыкталган. Башкача айтканда, бир учурда ушунча малды кармап туруу мүмкүнчүлүгү бар. Суткасына бир малга 70 сом төлөнөт. Кааласа өздөрү карап, болбосо ал жердеги кызматкерлерге кайтартса болот. Чөп, жемди да ошол жерден сатып ала алышат. Бул зоналар сырттан кирген малдан ар кандай ылаң республика ичиндеги фермаларга тарап кетпеши үчүн ачылды. Анткени Кыргызстанга келип жаткан айрым аймактарда биздин малга сайылган вакцина колдонулбайт. Жыйынтыгында оору жуктурушу ыктымал. Бул жерде кармалып турган эки-үч күндүн ичинде ылаңга акысыз текшерилип, кан алынып, идентификациядан өткөрүлүп, тиешелүү документтери жасалат", — деди Марсбек уулу.
Аткаминер аталган долбоор ишкерлер тарабынан жасалып, саясатын министрлик жүргүзөрүн кошумчалады.
Подкасттын толук вариантын видеодон көрүңүз:
