Бири-бирин "соороткон" Чокморов менен Сейдакматова. "Уландан" таберик сүрөт

СССРдин эл артисти Сүймөнкул Чокморов менен КРдин эл артисти Жамал Сейдакматованын сүрөтү Ысык-Көл облусунда 1977-жылы тартылып алынган.

Ал жылы режиссер Төлөмүш Океев "Улан" тасмасын тартып, Чокморов башкы каарман Азаттын, Сейдакматова анын көңүлдөшү Фатиманын образын жараткан.

Сүрөттөгү эки инсандын замандашы, Кыргыз Республикасынын эл артисти Гүлсара Ажыбекова ошол кезеңди мындайча эскерет:

"Жамал Сейдакматова менен "Улан", "Кызыл алма", "Ак илбирстин тукуму" өңдүү фильмдерде чогуу иштешип калдык. Андан сырткары, театрда да кесиптеш болуп жүрдүк. Мен Москвада окуп жүргөндө эле Жамал эже таанылып, эл арасында аты чыгып калган болчу. Кийин жогорку окуу жайды бүтүп келгенден кийин сахнага чогуу чыгып калдык. Театрда татаал мамилелер, кызганычтар болбой койбойт. Ага көпчүлүк чыгармачыл инсандар туруштук бере албайт. Актриса ошол учурлардын ыгын таап, бир калыпта баары менен иштеше билчү. Анан аябай эмгекчил, мээнеткеч эле. Акыркы жылдары спорт менен алектенип жүрдү, дайым кыймылда, күлүп-жайнап көпчүлүккө үлгү болду", — деди Ажыбекова.

Ал эми Токтогул атындагы мамлекеттик сыйлыктын лауреаты, актриса Жамал Сейдакматова көзү тирүү кезинде актер Сүймөнкул Чокморов менен режиссер Төлөмүш Океев жөнүндө мындай деген:

"Мен "Уланда" бөтөлкө сатып алып иштеген Фатиманын ролун жараткам. Тартуу иштери дайыма ыр-күлкү менен коштолчу, Океев менен Чокморовдун тамашасы түгөнчү эмес. Негизи Сүймөнкул менен иштөө аябай жеңил болчу, камчы салдырбаган таланттуу актер эле. Режиссерубуз Төлөмүш Океев да аябай жөнөкөй, бардык артисттерди жакшы көрүп тамашалап, шайыр жүрчү. Мен аны менен дос катары мамиледе болуп, үй-бүлөсү менен катышчубуз. Бой көтөрүп жүргөнүн такыр көргөн жокмун, адамгерчилиги бийик, таланттуу инсан эле. Режиссер каза болгондо актерлор катуу кайгырып ыйлап, "эмнеге бизди таштап кеттиң" дегенге чейин барган. Эмгектеринде терең ой, философия камтылган. Океев өзү актерлордун ичинен Чокморовду аябай жакшы көрчү. Аны менен иштешип калганыма сыймыктанам. Негизи эле ошол кезде Болот Бейшеналиев, Советбек Жумадылов, Орозбек Кутманалиев, Мелис Убукеев, Кадыржан Кыдыралиев сыяктуу таланттар чыгып, "кыргыз керемети" жаралган экен. Алардын көпчүлүгү бир мезгилде өтүп кетти, кээде өзүмдү жалгыз калгандай сезип кетем...", — деген актриса.

"Улан" кинофильминде ичкиликке берилип үй-бүлөсүнөн, жумушунан айрылып, соңунда түрмөгө камалган адамдын тагдыры баяндалып, аны менен киночулар коомдогу аракечтик маселесин көтөргөн.

Аталган эмгек 1978-жылы Еревандагы Бүткүл союздук XI кинофестивалда, Ташкенттеги V Азия, Африка, Латын Америка өлкөлөрүнүн эл аралык кинофестивалында Төлөмүш Океев мыкты режиссёрдук иши жана Сүймөнкул Чокморов эркектин ролун өтөсүнө чыгара аткаргандыгы үчүн сыйлык алган.