БИШКЕК, 12-дек. — Sputnik. Кыргызстандын экономикасында төмөндөө токтой элек. Бул тууралуу Улуттук статистика комитети маалымдады.
Алдын ала маалыматтарга караганда, ички дүң продукция январь-ноябрь айларында 511 миллиард сомду түздү. Бул былтыркы жылдын ушул убагына салыштырмалуу 8,1 пайызга төмөн.
Өндүрүш продукцияларынын көлөмү жыл башынан бери 290 миллиард сомго чукулдады. Былтыркы жылга салыштырганда бул 5,5 пайызга төмөндөгөнүнөн кабар берет. Буга күйүүчү майдын көлөмүнүн кыскарышы (5,68 пайызга), булгаары жана андан жасалган буюм, бут кийим (20,6) резина жана пластмассадан жасалган буюмдар (8,4 пайыз), жыгач жана кагаздан жасалган буюмдар (4,6 пайыз), азык-түлүктү өндүрүү, тамеки азыктары (4,3 пайыз), темир жана темирден жасалган буюмдар (2,6 пайыз), ошондой эле жер астынан казылган баалуу металлдарды казуу (22 пайыз) тармактарында иштин азайышы себеп болгон.
"Ал эми айыл чарбасында оң тенденциялар байкалды. Анда өндүрүүнүн көлөмү 0,9 пайызга өстү", — деп айтылат билдирүүдө.
Аймактарда тамак-ашка баа жана тарифтер 7,2 пайызга өсүп кеткен.
ЕАЭБ курамына кирген өлкөлөр менен соода-сатык январь-октябрь айларында 2 миллиард долларды түзүп, 13,7 пайызга азайды.
