БИШКЕК, 6-дек. — Sputnik. Бир күндө 10 саат отуруп иштеген адам ден соолугу чың болуусу үчүн 30-40 мүнөт өтө активдүү кыймылдап коюшу керек. Бул тууралуу британиялык окумуштууларга таянып "Лайфхакер" сайты жазды.
Окумуштуулар төрт мамлекеттен 44 370 кишини медициналык кароодон өткөрүшкөн. Ал эми алардын канча кыймылдаарын билиш үчүн тагынып жүргөн фитнес-трекерлердеги маалыматтарды колдонушкан.
Жыйынтыгында отуруп иштесе дагы бир саатка жетпеген убакыт активдүү кыймылдаган адамдардын арасында өлүмдүн саны такыр эле отуруп иштебегендерге жакын экени белгилүү болгон.
"Сөзсүз эле машыгуу залына баруунун зарылдыгы жок. Үй жумуштарын жасап, лифт эмес, тепкич менен менен көтөрүлүп же балдар менен ар кандай оюндарды ойноо деле жетиштүү", — деп айтышкан окумуштуулар.
Адистер иштен алаксыбай туруп деле кеңседе же үйдүн ичинен ары-бери басуу организмге бир топ пайда алып келерин кошумчалашты.
