БИШКЕК, 22-сен. — Sputnik. Эл көп чогулган жерде бет кап тагынбагандарга жаза берүү каралууда. Бул туурасында Республикалык ыкчам штабдын кеңешмесинде айтылган.
Ага ылайык, саламаттык сактоо тутуму менен мамлекеттик органдарга коронавирустук инфекцияга кабылгандардын көбөйүү ыктымалдыгына даяр болушу эскертилген.
“Кеңешмеде коомдук жайларда милдеттүү түрдө бет кап тагынуу жана аталган маселе боюнча административдик мүнөздөгү таасир этүү чаралары жаатындагы башка мамлекеттердин тажрыйбасын пайдалануу мүмкүндүгү талкууланды”, — деп айтылат маалыматта.
Биринчи вице-премьер Алмазбек Баатырбеков тармактык органдар жана жергиликтүү өз алдынча башкаруу органдары жер-жерлерде түшүндүрүү иштерин жүргүзүп, адам көп чогулган жайларда бет кап тагынуу режимин кармануу боюнча ишти күчөтүүсү тийиш экенин белгиледи.
Чыналиева: эми деле адамдар коронавируска массалык түрдө чалдыгышы мүмкүн
Ошондой эле Республикалык штабдын мүчөлөрү соода борборлору, супермаркеттер жана көңүл ачуучу жайларда тепловизор, санитайзерлер болуп, келгендерден бет кап тагынууну талап кылышы керектигин билдиришкен. Андан сырткары, соода түйүндөрүн жана базарларды үзгүлтүксүз дезинфекциялоо тапшырылган.
Кеңешменин жыйынтыгы боюнча, биринчи вице-премьер маморгандарга, анын ичинде Саламаттык сактоо министрлигине коронавируска каршы күрөшүүдө жакынкы жана алыскы чет өлкөлөрдүн тажрыйбасын карап чыгуу тапшырмасын бергени айтылды.
