БИШКЕК, 20-авг. — Sputnik. Американын атайын кызматтары Ухань шаарынын бийлиги Кытайдын жетекчилигинен коронавирус тууралуу маалыматты жашырып койгон деп айыптап чыкты. Бул тууралуу РИА Новости New York Times басылмасына шилтеме берип жазды.
Расмий өкүлдөрдүн айтымында, АКШнын атайын кызматтары өз докладында коронавирустун очогу болгон Хубэй провинциясындагы Ухань шаарынын бийлиги "Кытайдын борбордук жетекчилигинен маалыматты жашырганга аракет кылган" деген жыйынтыкка келишкен.
Американын мурдагы жана азыркы расмий адамдары басылмага билдиргендей, Кытайдын жергиликтүү бийлик өкүлдөрү "көп учурда Пекинден маалыматты жашырышат, себеби репрессиядан коркушат".
Шахтёрлор ооруп... Окумуштуулар COVID 2012-жылы эле чыкканын болжошууда
АКШнын бийлиги, анын ичинде президент баш болуп Кытайды коронавирусту чыгарган, өз убагында чара көрбөй жайылтып жиберген, фактыларды жашырган деп байма-бай күнөөлөп келет. Ал эми Кытай башынан бери маалыматтар ачык-айкын болгонун кайталайт.
Кытай бийлиги былтыр 31-декабрда ДССУга өлкөнүн борбордук бөлүгүндөгү Ухань шаарында (Хубэй провинциясы) белгисиз пневмониянын келип чыгышы жөнүндө маалымдашкан. Адистер ооруну жаңы коронавирус козгогонун аныктап, кийинчерээк инфекция расмий түрдө COVID-19 деп аталган. 11-мартта коронавирус пандемиясы жарыяланган. Учурда ооруну 20 миллиондон ашык адам жуктурду.
