БИШКЕК, 30-июл. — Sputnik. Кыргызстанда коронавирустан 73 медик көз жумду. Бул тууралуу Саламаттык сактоо министрлигинин Адам ресурстарын башкаруу жана уюштуруу иштери башкармалыгынын жетекчиси Айгүл Бообекова билдирди.
Адис каза болгон медицина кызматкерлеринин жакындарына көңүл айтты.
Бүгүн Кыргызстанда COVID-19 пандемиясынын курмандыктарын эскерип, аза күтүү күнү.
"73 кызматкердин арасынан 44ү дарыгер. Негизи бул тизмеге жеке клиникаларда, медициналык кызматтарда иштеген адистер жана пенсионерлер киргизилген. Маркумдардын жакындарына "Компенсациялык төлөмдөр" жобосунун алкагында өткөрүлгөн иликтөө иштери аяктаган соң убадаланган компенсация төлөнөт", — деп айтылат билдирүүдө.
Медиктердин компенсациясына канча каражат кеткени айтылды
Пандемия башталгандан бери Кыргызстанда коронавирус жуктуруп алган учурлардын саны 35 143кө жетти. Анын ичинен 24 474 киши ооруну жеңип, айыкты. Тилекке каршы, коронавирус 1 364 кишинин өмүрүн алды.
