БИШКЕК, 28-июл. — Sputnik. Коронавирус менен күрөшүүдө кыргызстандык кесиптештерине жардам берүү үчүн Россиядан келген медиктердин арасынан сегизи Ысык-Көл облусуна барды. Бул тууралуу Sputnik агенттигинин жергиликтүү кабарчысы маалымдады.
Алар облустагы бир катар ооруканаларды кыдырып, вирус менен күрөшүү боюнча тажрыйба бөлүшүүдө. Мындан тышкары, медиктер обсервация жайларына дагы барып турмакчы.
Аймактагы абал менен таанышкан Башкыртстан медициналык универсистетинин госпиталдык терапия кафедрасынын башчысы Булат Бакировдун айтымында, Ысык-Көлдө эпидемиологиялык абал туруктуу.
"Кыргызстандык дарыгерлер биз бул жакта колдонууну пландап жаткан ыкмаларга жакын метод менен иштеп жатыптыр. Жакында жаңы ыкма киргизип, оору менен күрөшүү боюнча жыйынтыктарды жакшыртабыз. План боюнча биз 100-150 оорулуу дарыланып жаткан төрт стационарда иш алып барабыз", — деди Бакиров.
Дарыгерлердин арасында реаниматолог, кардиолог, пульмонолог жана ординаторлор бар.
Иш-чаранын алкагында россиялык медиктер Каракол шаарындагы Пржевальскийдин музейине барып, эстеликке гүл коюшту.
СOVID: кол кабыш кылууга Россиядан дагы медиктер келди. Сүрөт түрмөк
Эске салсак, өткөн аптада Кыргызстанга россиялык адистердин эки тобу келген. 22-июлда Россиянын Коргоо министрлигинин учагы 19 дарыгерден турган медициналык алты бригада менен кошо дары, атайын медициналык жабдуу, дезинфекция кыла турган жана коргонуучу каражаттарды жеткирди.
Эртеси, 23-июлда, Россиянын Өзгөчө кырдаалдар министрлиги Бишкекке Кыргызстандын ооруканаларында иштей турган 58 адисти алып келди.
