БИШКЕК, 25-июл. — Sputnik. Бишкек, Ош шаарларына салына турчу жаңы ооруканаларга жана аймактарда оңдолуп жаткан имараттарга медициналык жабдууларды сатып алуу иштери азыртан жүргүзүлүп башташы керек. Бул тууралуу премьер-министр Кубатбек Боронов Республикалык штабдын жыйынында билдиргенин өкмөттүн маалымат кызматы жазды.
Ага ылайык, Боронов жаңы ооруканалар элге толук кандуу медициналык тейлөө көрсөтүшү зарыл экенин белгилеген.
"Курулуш жана оңдоп-түзөө иштери башталган медициналык жайларда интенсивдүү терапия жана реанимациялык орундар тийиштүү деңгээлде камсыздалышы зарыл. Ошондуктан ал жакка медициналык жабдууларды сатып алуу иштери азыртан жүргүзүлө баштасын", — деди премьер-министр.
Боронов Бишкек менен Ошко жаңы оорукананы бир айда куруп бүтүүгө тапшырма берди
Ал дары-дармектерди мамлекеттик деңгээлде сатып алуу иши үзгүлтүксүз жүргүзүлүшү керектигин дагы айткан.
"Оорукана, үй-бүлөлүк дарыгерлер тобун дары-дармек менен камсыз кылуу үзгүлтүккө учурап калбасын. Мындан тышкары, фармацевтикалык компаниялардын препараттарды ташып келүүсүнө шарт түзүү иштерин күчөтүү керек. Ошол эле учурда дарылардын баасы негизсиз жогорулап кетпешин көзөмөлдөө шарт", — деди Боронов.
Белгилей кетсек, ушул жумадан тарта Бишкек жана Ош шаарларына 100 орундуу жаңы эки оорукана курула баштайт.
1200дөн ашык орун бар. Бишкекте бошогон ооруканалардын тизмеси
