БИШКЕК, 11-май — Sputnik. Коронавируска кабылган 10 кишинин баары айыгып чыкты деген Ысык-Көл облусунда дагы эки кишиден COVID-19 чыкты. Бул тууралуу өкмөттүн Ысык-Көл облусу боюнча өкүлчүлүгүнөн билдиришти.
Маалыматка караганда, биринчиси Жети-Өгүз районунун Тамга айылына таза суу киргизүү долбоору боюнча 4-май күнү Нарын шаарынан келген 39 жаштагы киши.
"Жети-Өгүзгө келген 16 жумушчудан тест алынып, жыйынтыктары таза чыккан. Бирок алар коронавирус күч алып турган Нарын облусунан келгендиктен, обсервацияга жаткырылган. 7-май күнү экинчи тест алынып, бир адамда коронавирус бар экени аныкталды", — деп айтылат билдирүүдө.
Мындан тышкары, Екатеринбургдан алып келинген мекендештердин арасынан чыккан. Ал Каракол шаарында.
Белгилей кетсек, буга чейин Ысык-Көл облусунда коронавирус жуктурган 10 адамдын баары айыгып чыккан. Бирок бүгүн эки жаңы учур тууралуу айтылды. Бири Нарын облусунан барган киши болсо, экинчиси Екатеринбург шаарынан апрель айынын аягында келген жаран. Алгач ал Бишкекте "Ак-Кеме" мейманканасында обсервацияда жатканы айтылды.
Коронавирустун кесепети
11-майдан тарта айрым аймактардагы өзгөчө абал режими алынып, ал эми өлкө боюнча киргизилген өзгөчө кырдаалдын мөөнөтү узартылды. Бишкек, Ош шаарларында, Ат-Башы районунда жана Чаткал районунун Каныш-Кыя айыл аймагына карантин жарыяланды. Бул жергиликтүү бийликке кырдаалга жараша чектөөлөрдү киргизүүгө укук берет.
Өлкөдө учурда абал кандай болуп жатканын Sputnik Кыргызстан агенттиги жүргүзгөн тексттик трансляциядан билүүгө болот.
Кабарларды ыкчам, ыңгайлуу шартта окуу үчүн Telegram-каналыбызга баш багыңыз.
