Бюджет 30 млрд. сомго эңшерилет. Чет өлкөдөн насыялар кандай шартта алынууда

БИШКЕК, 13-апр. — Sputnik. Финансы министрлиги коронавирус пандемиясынан улам быйыл республикалык бюджетке 30 миллиард сомдон ашык акча түшпөй калат деген божомолун жарыялады.

Маалыматка ылайык, бүгүнкү күндө өлкөдө дээрлик бардык бизнес убактылуу токтоду. Бул жагдай республикалык бюджетти аткарууга олуттуу таасирин тийгизүүдө.

"Пандемиянын кесепеттери коомдук турмушубуздун бардык тармактарына терс таасирин тийгизүүдө. Натыйжада дүйнө мамлекеттеринин көпчүлүгүндө, анын ичинде биздин өлкөдө да жагымсыз экономикалык жагдай жаралды. Республикалык бюджеттин киреше бөлүгү боюнча төмөндөө процесси жүрүп жатат. Ошол эле убакта COVID-19 инфекциясына каршы күрөшүү боюнча жүргүзүлгөн иш-чараларга байланыштуу бюджеттин чыгашалары көбөйүшү мүмкүн", — деп айтылат маалыматта.

Мындан улам Финансы министрлиги кырдаалды жакшыртуу үчүн эл аралык финансы институттары менен донор өлкөлөрдүн гранттарын алуу боюнча макулдашуу болуп жатканын билдирди. Андан сырткары, эң төмөнкү пайыздык чен менен мүмкүн болушунча узагыраак мөөнөткө берилүүчү кредиттерди алуу боюнча иштер жасалууда

Карыздар төмөнкүдөй шарттар менен алынууда:

Эл аралык валюта фонду — 120,9 миллион доллар 0,7 пайыздык чен менен 10 жылга;

Азия өнүктүрүү банкы — 100 миллион доллар 1 пайыздык чен менен 32 жылга;

Дүйнөлүк банк — 12 миллион доллар 0,75 пайыздык чен менен 38 жыл.

Аталган кредиттердин шарттарында ар кандай жеңилдетилген мөөнөттөр бар экени белгиленет. Мындан сырткары, кредиттерге кошуп гранттар дагы алынып жатканы маалымдалды.

Каржылоо бюджетти колдоо, COVID-19 менен күрөшүү жана бизнести колдоо үчүн үч багытта жумшалат.

Учурда кыргыз өкмөтү сүйлөшүүлөрдү 15тен ашуун өнөктөштөр менен жүргүзүүдө.