БИШКЕК, 29-мар. — Sputnik. Биринчи вице-премьер Кубатбек Боронов өкмөттүн облустардагы ыйгарым укуктуу өкүлдөрүнүн катышуусуда Республикалык ыкчам штабдын жыйынын онлайн-режимде өткөрдү.
Анын жүрүшүндө Саламаттык сактоо министрлигинин жетекчилигинин уюштуруучулук жана башкаруу иштеринин чабалдыгын сынга алды.
"Министрликтин жетекчилигинин уюштуруучулук жаатында кемчиликтерин көрүп турабыз. Бул биз тараптан да, калктын да нааразылыгын жаратпай койбойт. Анын баары жоюлат, дарыгерлердин керектөөлөрүн камсыздоо, ӨА режиминде автоунаа, уруксат маселелери да чечилет. Алдыңкы катарда иштеп жаткан лаборанттар, вирусологдор, эпидемиологдор үчүн тоскоолдуксуз жана коопсуз иштөөнүн бардык шарттары түзүлөт. Калган мамлекеттик жана жергиликтүү органдар буга жардам көрсөтүшөт", — деди Боронов.
Мындан сырткары, ал Кайгуул милициясынын ишмердүүлүгүн да сындап, көчөлөрдө жарандардын жүрүүсүн максималдуу түрдө чектөөгө тапшырма берди.
Биринчи вице-премьер жер-жерлерде дезинфекциялоо иштерин жүргүзүү жана Бишкекке кирип-чыккан автоунааларды дагы дезинфекциялоону тапшырган.
Коронавирус Кыргызстанда
Бүгүн Кыргызстанда дагы 26 адам COVID-19 инфекциясын жуктурганы аныкталды. Ушуну менен өлкөдө коронавируска кабылгандардын саны 84кө жетти. Алардын басымдуу бөлүгү Ош жана Жалал-Абад облустарында.
Бишкек, Ош, Жалал-Абад шаарлары менен Сузак, Кара-Суу, Ноокат райондоруна өзгөчө абал киргизилип, кечки саат 20:00дөн кийин көчөгө чыгууга тыюу салынган. Мындай режим 15-апрелге чейин уланат.
Ушу тапта өлкө ичинде абал кандай болуп жатканын Sputnik жүргүзгөн тексттик баяндамадан билүүгө болот.
