БИШКЕК, 12-мар. — Sputnik. Кытайда коронавирус эпидемиясы басаңдады. Бул тууралуу РИА Новости Саламаттыкты сактоо маселелери боюнча комитеттин өкүлү Ми Фэнге шилтеме берип жазды.
Анын айтымына караганда, Уханды эске албаганда Хубэй провинциясындагы бардык шаарларда бир жумадан бери вирус жуктурган бир дагы жаңы факт каттала элек. Ал эми Хубэйден башка аймактарда вирус жуктурган жети учур катталды. Анын алтоо чет өлкөдөн киргендер.
"Бул маалыматтар өлкөдө эпидемия басаңдап калганынан кабар берет", — деди Ми Фэн.
Ал ошондой эле вирус тараган жаңы учурлар азайып, эпидемия төмөнкү деңгээлде экенин кошумчалады.
COVID-19
2019-жылдын декабрь айынын аягында Кытайдын Ухань шаарында белгисиз өпкө оорусу жайылып баратканы байкалган. Оору деңиз азыктарын саткан базардан тараган. Адистер дарттын козгогучу коронавирустун 2019-nCoV деп аталган жаңы тиби экендигин боолголошкон. Учурда ал дүйнөнүн 100дөн ашык өлкөсүнө тарап, жуктуруп алгандардын саны 126 миңден ашты. Алардын ичинен 4638 киши каза болуп, 68 284ү сакайды. 11-март күнү кечке жуук Дүйнөлүк саламаттыкты сактоо уюму дүйнө жүзү боюнча коронавирус пандемиясын жарыялады.
