БИШКЕК, 10-янв. — Sputnik. Абхазия парламенти президент Рауль Хажимбага кызматын тез арада өткөрүп берүү боюнча кайрылган токтом кабыл алды. Бул туурасында Sputnik Абхазия жазды.
Ага 19 депутат "макул" десе, төртөө каршы чыгып, ал эми бирөө калыс экендигин билдирген.
Буга жооп кылып Абхазия президентинин маалымат кызматы билдирүү тараткан.
Анда парламент кабыл алган билдирүү дестабилизациядан алыс болуу ниетин көздөгөнү менен саясий-коомдук абалды чыңалтып, өлкө үчүн кесепетин тийгизиши мүмкүн деп айтылган.
Билдирүүдө оппозиция өкүлдөрүнүн "шайлоо жыйынтыгы боюнча Жогорку соттун чечимин күтүп, укуктук талаанын эрежелери менен иш кылабыз" деп айтканын да белгилешкен.
"Өзүнүн талаптарынын сотто келечеги жок экендигин билип, оппозиция радикалдык ыкмаларга барууну чечти", — деп айтылган билдирүүдө.
Хажимба өлкөдө стабилдүүлүктү сактап жана макулдашууга келүү үчүн кепке келип, сүйлөшүү зарылдыгын айткан.
Абхазиядагы митинг
9-январда Абхаз драма театрынын жанындагы аянтта оппозиция өкүлдөрү президенттик шайлоонун жыйынтыктарын жокко чыгарууну жана мамлекеттин азыркы башчысы Рауль Хажимбанын отставкасын талап кылган.
Саат 13:15те акциянын катышуучулары драмтеатрдын жанындагы аянттан президенттин администрациясынын имаратына келген. Чогулган миңге чукул киши бир саат ичинде имараттын ичине айнектерди талкалап кирип келген. Ал эми саат 15:00дө имаратты басып алган.
9-январда кечинде борбор калаа Сухумиде Хажимба катышкан Коопсуздук кеңешинин шашылыш жыйыны өткөн. Анда мамлекет башчы абхаздарды тынчтыкты сактап, чагымчылдыкка алдырбоого чакырган. Эгер жарандар токтобосо, чукул кырдаал киргизиле тургандыгын эскерткен.
Андан сырткары, 9-январь күнү кечинде оппозиция лидери, парламент депутаты Аслан Бжания келген. Алгач президенттик аппараттын имаратында нааразылык акциясынын катышуучулары менен жолугуп, андан соң Эл өкүлдөрүнүн шашылыш өтүп жаткан жыйынына катышкан.
