БИШКЕК, 6-ноя. — Sputnik. Турдакун Усубалиев Кыргызстанды кооптуу долбоорлорду ишке ашыруудан сактап калган. Бул тууралуу президент Сооронбай Жээнбеков Усубалиевдин 100 жылдык мааракесине арналган салтанатта билдирди.
Мамлекет башчысы учурунда Усубалиев Соң-Көлдүн суусун Нарын дарыясына бурабыз деген коогалаңдуу долбоордон жана Чаткал дарыясына суу сактагыч куруп, ал территорияны сууга бастыра турган коркунучтан сактап калганын улуу муун жакшы билерине токтолду. Аны менен катар Чүйдө кара куурайды өстүрүүнү токтотууга жетишкенин айтты.
"Чүйдө кара куурайды, Ысык-Көлдө апийимди өстүрүүнү токтотуу үчүн Союздун деңгээлинде кайра-кайра маселе коюп жүрүп элибиздин генофондун зыян келтирчү чоң кырсыктан сактап калган. Бул аракеттери анын канчалык көрөгөч жана даанышман, өз эли-журтун сүйгөн мыкты патриот уул болгондугун айгинелеп турат", — деди Жээнбеков.
Президент өз сөзүндө Усубалиевдин кылган эмгеги башынан аягына чейин жалпы элге, өлкөнүн кызыкчылыгына арналганын белгиледи.
