БИШКЕК, 11-сен. — Sputnik. Apple корпорациясы iPhone смартфонунун, iPad планшетинин жаңы моделин жана бешинчи муундагы Apple Watch саатын көрсөттү.
Бет ачар 10-сентябрь күнү Калифорния (АКШ) штатында болду. Чогулгандарга iPhone 11, iPhone 11 Pro жана iPhone 11 Pro Max үлгүсүндөгү үч жаңы смартфонду көрсөтүштү.
Эң арзан iPhone 11 модели 6,1 дюймдук дисплей жана A13 Bionic процессору менен жабдылган. Ошондой эле аппаратка секундуна 60 кадрдык 4К форматындагы видеолорду тарткан камера орнотулган. Анын баасы — 699 доллар.
iPhone 11 Pro жана Pro Max моделдери көлөмү менен айырмаланып турат. Экрандардын диагоналы 5,8 жана 6,5 дюйм. Биринчиси — 1 000, экинчиси — 1 100 доллар турат.
Ал эми жаңы Apple Watch саатынын дисплейи ар дайым күйүп турат. Мурда экранды күйгүзүү үчүн үстүнө басып же колду кыймылдатуу керек болчу. Саатка компас коюлган. Ошондой эле анын ээси шашылыш кызматтарды смартфону жок эле ушул саат аркылуу чакыра алат. Баасы — 499 доллар.
#Apple today unveiled the new #AppleWatch Series 5 at the #AppleEvent, and it features a new Always-On Display! pic.twitter.com/EelHWdZoka
— AppleInsider (@appleinsider) 10 сентября 2019 г.
Анткен менен уюлдук телефондор индустриясындагы адистер бул жаңы аппараттардын "келечеги жок" деп баалашууда.
"Инновациялар жагына келгенде Apple атаандаштарынан артта калып бара жатат. Жаңы iPhone менен элди кызыктыруу абдан татаал болот", — деди Technalysis компаниясынын аналитиги Боб О'Доннелл.
Жаңы аппараттар сатыкка 20-сентябрда чыгарылмакчы.
