БИШКЕК, 15-авг. — Sputnik. Фотокапкандар Кызыл китепке кирген жаныбарлар коруктун сыртында жүргөнүн тартып алды. Бул тууралуу Германиянын Кыргызстандагы жаратылышты коргоо союзунун (NABU) маалымат катчысы Зарина Эсенбаева билдирди.
Анын айтымында, NABU уюмунун кызматкерлери Биотүрдүүлүктү жана өзгөчө коргоодогу жаратылыш аймактарын сактоо департаментинин Ысык-Көлдөгү өкүлчүлүгү менен биргеликте 30дан ашык фотокапканга тартылган сүрөттөрдү чогултушкан.
"Көңүл көтөрө турган жагдай — сүрөттөр коруктун сыртынан тартылган. Башкача айтканда, Кызыл китепке кирген жаныбарлар аларды коргобогон аймактарды да байырлай баштады. Бул жакшы көрүнүш. 27-майдан 8-августка чейин фотокапканга ак илбирс, мадыл, аюу жана маралдар түшкөн. Андан сырткары, сүлөөсүн, тоо теке, каман, элик, улар, кашкулак да сүрөткө тартылган", — деди Эсенбаева.
Ал фотокапкандар Ысык-Көлдүн Ак-Суу жана Түп райондоруна деңиз деңгээлинен 2500-3700 метр бийиктикке чейин коюлганын кошумчалады.
