ЫСЫК-КӨЛ, 26-июл. — Sputnik. Ысык-Көлдүн күнгөй жээгинде "сары кыздын" быйылкы тою башталды.
Өрүк негизинен Тосор, Тамга, Барскоон, Чоң-Жаргылчак, Кичи-Жаргылчак, Ак-Терек жана Жеңиш айылдарында көп өстүрүлөт. Дыйкандардын алды 10 гектар жерге өрүктүн түрүн эгишет. Төрт гектар жерге өрүк тиккен Тосор айылынын тургуну Алтынай Абакованын айтымында, быйыл өрүк аз болгону менен сапаты жакшы.
"Былтыркыга караганда өрүк аз байлады, бирок сапаты жакшы. Өткөн жылы өрүктү кайда өткөрөрүбүздү билбей кор болгонбуз. Айла жок акчасын кийин алабыз деп берип, эмдигиче ала албай жүрөбүз. Быйыл андай кыйынчылык жок. Баасы былтыркыдай эле 35 сомдон башталып, 25 сомго түштү. Эми буюрса, өрүктүн "Королевский" сорту бышайын деп турат. Анын баасы катардагы абрикостон өйдөрөөк болот. 45-50 сом деген бааны күтүп жатабыз. Азыркы учурда ак өрүктүн (шалак деп коёт) баасы 45 сом болуп жатат", — деди ал.
Белгилей кетсек, жергиликтүү дыйкандарды колдоо максатында 2015-жылдан бери үч жыл катары менен "Өрүк фест" фестивалы өткөн. Быйыл ал фестиваль болбойт, кийинки жылы өткөрүү пландалып жатканын кабарчыбыз билдирди.
Баса, буга чейин өрүк салчу ящиктер талашка түшкөн.
