Токио Олимпиадасында ыйгарыла турган медалдар көрсөтүлдү. Өзгөчөлүгү

БИШКЕК, 25-июл. — Sputnik. 2020-жылы Токиодо өтө турган Олимпиада оюндарынын уюштуруу комитети жеңүүчүлөргө ыйгарыла турган медалдарды көрсөттү. Бул тууралуу Олимпиаданын расмий сайтында айтылат.

Медалдарды көрсөтүү аземи 24-июлда, тагыраагы, Олимпиадага туура бир жыл калганда өттү.

​Уюштуруучулардын билдирүүсүнө ылайык, алтын, күмүш жана коло медалдар кайра иштетилген мобилдик телефондор менен электрондук түзүлүштөрдөн жасалган. 

"5000ге чукул медаль япон жашоочулары тарабынан берилген электрондук түзүлүштөрдү кайра иштетүүдөн кийин жасалды. Майда тиричилик электроникасын кайра иштетүү боюнча долбоорубуз жана экологияга зыян келтирбөө аракеттерибиз көпчүлүккө үлгү болуп калат деген ниеттебиз", — деп айтылат маалыматта.

Жергиликтүү элден электрондук түзүлүштөрдү чогултуу аракетин Олимпиаданын уюштуруу комитети 2017-жылы баштаган. Эки жылдын ичинде жалпысынан 78 895 тонна гаджет чогулган. Бул 6,21 миллион мобилдик телефонду эсептебегендеги көрсөткүч. Натыйжада аларды кайра иштетүүдөн демилгечилер 32 килограмм алтын, 3,5 тонна күмүш жана 2,2 тонна коло алышкан.

Жайкы Олимпиада оюндары Токиодо 2020-жылы 24-июлдан 9-августка чейин өтөт. Ага 205 өлкөдөн 12 миңдин тегерегиндеги спортчу катышары болжолдонуп жатат.