БИШКЕК, 21-июл. — Sputnik. Дрифт боюнча чемпионатта элди сүзүп кеткен унаа видеоблогер Алексей Лиге таандык экендиги маалым болду.
Автосүйүүчү буга чейин Sputnik Кыргызстан маалымат агенттигинин журналистине унааны 25 миң сомго сатып алып, оңдоп-түзөө иштерине 4 500 доллар жумшаганын айтып берген. Автокөлүктү калыбына келтирүү үчүн жарым жыл сарпталып, анын ишине блогерлер көз салып турушкан.
Июнь айында Алексей Ли машинасынын ачылышын жасап, аны менен жарышуу мелдештерине катышуу максаттары бар экендигин билдирген.
Эске сала кетсек, бүгүн, 21-июнда, Бишкектеги "Жеңиш" аянтында дрифт боюнча Gradus Cup аталышындагы чемпионат өткөрүлмөк. Бирок ачылыш аземине аз калганда Toyota Mark I автоунаасынын кожоюну рулду башкара албай, элди көздөй күү менен барып кирип кеткен. Окуя видеого түшүп калган.
Медиктердин билдирүүсүндө, ар кандай жаракат менен беш адам ооруканага жеткирилди. Ал эми айдоочу жабыркаган жок. Бүгүнкү боло турган мелдеш токтотулган. Ал эми иш-чаранын уюштуруучулары комментарий берүүдөн баш тартты.
Катышуучулар менен коноктордун коопсуздугун эске алуу менен мелдешти өткөрүү үчүн уруксатты Свердлов райондук администрациясы берген. Окуядан кийин мэриядан дрифт өңдүү турнирлерге тыюу салууну пландап жатканын билдиришти.
