БИШКЕК, 18-июн. — Sputnik. Жогорку Кеңеш комиссиясы эки күндүк иликтөөдөн кийин мурунку президент Алмазбек Атамбаевди "экс" макамынан ажыратуу үчүн сунуштаган тогуз айыпты алтыга кыскартты. Бул тууралуу парламенттин маалымат кызматы билдирди.
Эскерте кетсек, комиссия 13-июнда түзүлгөн. Ал бир жуманын ичинде ишин жыйынтыктап, экс-президентке койгон айыбын аныкташы керек эле.
Атамбаевге коюлган күнөөлөрдүн тизмеси төмөндөгүдөй:
Бишкек ТЭЦин модернизациялоонун жүрүшүндөгү коррупциялык жосундар;
Кримтөбөл Азиз Батукаевдин түрмөдөн мыйзамсыз бошотулушуна катышы;
ТЭЦке көмүр сатып алуудагы мыйзам бузуулар;
Ысык-Көл районунун Чоӊ-Сары-Ой айылындагы 4,6 гектар жерди "Фрунзе Резорт" компаниясына чыгарып бериши:
Анын бир участогун өзү пайдаланышы.
Белгилей кетсек, мурдагы мамлекет башчы Алмазбек Атамбаевди экс-президент статусунан ажыратуу үчүн ага каршы күнөө коюу боюнча түзүлгөн комиссиянын корутундусунун долбоору Жогорку Кеӊештин Конституциялык мыйзамдар, мамлекеттик түзүлүш, сот-укук маселелери жана ЖК Регламенти боюнча комитетте каралууга тийиш.
Ал арада КСДП Атамбаевди "экс" макамынан ажыратмакчы болгон комиссия мыйзамсыз түзүлгөнүн айтып чыкты.
