БИШКЕК, 31-май — Sputnik. Жогорку Кеңештин депутаты, "КТ Мобайл" мамлекеттик ишканасынын айланасындагы иштерди текшерүү үчүн түзүлгөн депутаттык комиссиянын төрагасы Курманкул Зулушев аталган комиссия премьер Мухаммедкалый Абылгазиевдин шаалакылыгынан улам түзүлгөн деген пикирин айтты.
Бүгүн, 31-майда, "КТ Мобайл" мамлекеттик ишканасынын ишмердигин иликтеген депутаттык комиссиянын жыйыны болду. Ага премьер-министр Абылгазиев баштаган өкмөт мүчөлөрү катышты.
"Ачык айтканда, депутаттык комиссиянын түзүлүшүнө сиздин шалаакылыгыңыз себеп болду. Сиз ошол маалымат чыкканда ("КТ Мобайлдын" жетекчилери тууралуу — ред.) эле өкмөттү жыйнап туруп, азыр кызматтан кетирген жетекчилерди ошондо кубалап, бажаңызды кубалап, баласына баа берсеңиз комиссия да түзүлбөйт эле. Сиз өзүңүз оор басырыктуусуз, анан шашпайсыз, ошол таасир этип койду. Мындан кийин аракеттерди ыкчам жасашыңызды каалайт элем. Мамлекет үчүн, келечек үчүн ыкчам аракет болушу керек", — деди депутат.
Ал эми Абылгазиев депутаттын койгон кинесине макул эместигин айтты.
"Шалаакылык дегенге мен кошула албайм. Анткени премьердин ишине баа берилип жатат. Экинчиден, "КТ Мобайлдагы" окуя боюнча мен 2-майда билдим", — деди Абылгазиев.
Депутат Зулушев ал өкмөт башчыга айып койбогонун, болгону ыкчам аракет кылуу керек болчу деген ойду айткысы келгенин кошумчалады.
"Сизди күнөөлөгөн жокпуз. Ошол учурда тез аракет кылсаңыз, ушуну тутантпай басып коёт белеңиз деген ойду гана айттык. Сизге баа азыр эмес, комиссиянын ишинин жыйынтыгы менен берилет", — деди Зулушев.
Эл өкүлү өз сөзүндө кимде бул боюнча маалымат болсо аларга берүүсүн өтүнүп, жакында комиссия өзүнүн бүтүмүн палатага алып чыгарын айтты. Мамлекеттик мүлк фондусуна, "Кыргызтелекомго" жана Маалымат технологиялары жана байланыш комитетинин жетекчилигинин ишинин жоопкерчилигине баа берилерин эскертти.
