БИШКЕК, 31-май — Sputnik. 2019-жылдын январь-мартында бир кызматкердин орточо айлык номиналдык эмгек акысы (чакан ишканаларды эсептебегенде) 15 716 сомду түзүп, былтыркыга салыштырмалуу 4,1 пайызга көбөйдү. Бул туурасында Статистика боюнча улуттук комитеттен кабарлашты.
Маалыматта Улуттук банк аныктаган валюталардын расмий курсунун натыйжасында быйылкы жылдын январь-мартында бир кызматкердин орточо айлык эмгек акысы 225,2 долларды түздү.
Орточо айлык эмгек акынын өсүү темпинин олуттуу жогорулашы Талас (8,6 пайыз) жана Жалал-Абад облустарынын (4,4 пайыз), ошондой эле Ош шаарынын (5,2 пайыз) ишканаларында жана уюмдарында байкалган.
Эмгек акынын эң жогорку өлчөмү Бишкек шаары (20 403 сом), Нарын (15 346 сом), Чүй (14 476 сом) жана Жалал-Абад облустарынын (14 339 сом) кызматкерлеринде катталган.
