БИШКЕК, 15-май — Sputnik. Жогорку Кеңештин депутаттары "КТ Мобайл" мамлекеттик ишканасынын ишмердигин, айлык акыларын текшерүү боюнча депутаттык комиссия түздү. Мындай сунушту парламенттин 15-майдагы жалпы жыйынында 98 депутат колдоп, бир депутат каршы болду.
Алгач "Өнүгүү — Прогресс" фракциясынын лидери Бакыт Төрөбаев мамлекеттин үлүшү бар мекемелердин эффективдүүлүгүн, айлыктарын, премияларын текшере турган комиссия түзүү демилгесин көтөрдү. Аны депутаттар колдоого алды.
Ал эми депутат Төрөбай Зулпукаров КСДП фракциясы да "КТ Мобайл" мамлекеттик ишканасынын ишмердигин текшерүү боюнча чечим кабыл алганын айтып, алардын да сунушун эске алууну белгиледи.
"Биздин фракция да "КТ Мобайл" боюнча комиссия түзүүнү сунуштайт жана колдойт. Азыр ага (комиссиянын курамы - ред.) кирүүнү каалагандар көп болуп жаткандыктан, курамды такташыбыз керек болуп жатат", — деди ал.
Эске салсак, социалдык тармактарда "КТ-Мобайл" мамлекеттик компаниясынын башкы директору 350 миң сом, орун басары 300 миң, ал эми техникалык директору 290 миң сом айлык алары боюнча маалымат тараган. Кийин компаниянын жетекчилиги маалымат жыйын өткөрүп, башкы директордун айлыгы анчалык көп эмес экенин төгүндөгөнгө аракет кылып, компаниядагы эң жогорку айлык 157 миң сом экенин билдирген. Ошол эле учурда мынчалык айлыкты ким аларын коммерциялык сыр деген жүйө менен айткан эмес.
