Чет жерде иштеп жүргөн мекендештер чогулткан каражатына иш баштап, акчасын көбөйтүүгө аракет жасашы керек. Мындай пикирин Данияр Эмил Sputnik Кыргызстан радиосунун "Ачык кеп" программасында маек куруп жатып билдирди.
Анын айтымында, чет өлкөдө кыйналып иштеп тапкан акчанын Кыргызстанда той-аштарга сарпталып жатканы өкүнүчтүү.
"Мекендештерибиздин айлап-жылдап кыйналып иштеп келип, узак убакытта чогулткан акчасын мындай нерселерге короткону туура эмес. Тескерисинче, канча сумма чогулта алса ошону жүгүртүп, кыймылдатууга аракет жасоо зарыл. Ишкерликтин түрү көп. Өзүбүз кызыккан тармак боюнча иш алып баруубуз кажет. Ар бир тыйынды максаттуу, туура багытка иштетүү бизден көз каранды. Айрымдарыбыз 10 жыл бою иштеп, чогулткан акчабызга үй алабыз. Бул нерсенин оң да, терс да жагы бар. Терс жагы — үйгө салган акчанын жылбай, бир орунда туруп калышы", — деди Данияр Эмил.
Ал Кыргызстанда ишкерлик баштоого мүмкүнчүлүктөр көп экенин кошумчалады.
