БИШКЕК, 28-фев. — Sputnik. Жогорку Кеңештин депутаты Эмил Токтошев Кыргызстандагы нефтебазалар менен май куюучу жайлардагы күйүүчү майдын баасынын айырмасы 20 пайыздан ашып кеткенин айтып, буга ким чара көрөрүнө кызыкты.
Депутат өз сөзүндө бензин маселесин буга чейин да көтөргөнүн айтып, анда дүң жана чекене баанын айырмасы 10 сом болуп жатканын айтканын белгиледи. Эл өкүлү андан бери Монополияга каршы күрөшүү агенттиги эч кандай чара көрбөгөнүнө нааразы болду.
"Азыркы баа кандай? Бишкектин четиндеги нефтебазаларда АИ-92 үлгүсүндөгү бензин 32,80-33 сомдон сатылып жатат. Ал эми май куюучу жайларда 40 сом 90 тыйындан сатылууда. Дизелдин дүң баасы 39 сом, май куюучу жайларда 45 сомго чейин экен. Айырмасы 8 сом, 20 пайыздан ашып кетип жатпайбы", — деди ал.
"Бүгүнкү күнү айырма 20 пайыздан ашып жатат. Нефтетрейдерлер ассоциациясынын жетекчисинин айтканына таянсак, анда бизде бензин 36 сомдон сатылышы керек экен. Бирок бүгүн бензин 40-41 сомдон сатылууда", — деди ал.
Токтошев нефтебаза менен май куюучу жайдагы күйүүчү майдын баасындагы айырмага ким жооп берерин өкмөттүн өкүлүнөн сурады. Андан сырткары, чайкоочуларга, кызыл кулактык кылгандарга ким чара көрөрүнө кызыкты.
