БИШКЕК, 25-фев. — Sputnik. Бишкек шаарынын мэри Азиз Суракматов дээрлик бардык вице-мэрлерди кызматтан алганын мэриянын маалымат кызматы билдирди.
Ага ылайык, социалдык маселелер боюнча вице-мэрликке Татьяна Кузнецова дайындалды. Ал буга чейин Октябрь районунун акиминин орун басары болчу. Социалдык маселелер боюнча вице-мэр Асел Куламбаева иштен кеткенден бери орду бош
Транспорт тармагын тескеген вице-мэр Максим Ситников кызматынан бошотулуп, Октябрь районунун акими болуп дайындалды. Ситниковдун ордуна мэриянын жер ресурстары башкармалыгын жетектеп келген Азизбек Алымкулов келди.
Шаар куруу архитектура маселелери боюнча вице-мэрликке Уланбек Азыгалиев дайындалды. Ал буга чейин капиталдык курулуш башкармалыгын жетектеп келген.
Вице-мэр Рыспек Сарпашов ордунда калды.
Тийиштүү буйрукка калаа башчысы Азиз Суракматов кол койду.
