Испаниянын "Барселона" клубунун футболдук академиясында эки жылдык машыгуудан өткөн Эрбол Атабаев сыяктуу күчтүү өспүрүм балдар чет өлкөлөрдө көп. Бул тууралуу Эркинбек Абдуллаев Sputnik Кыргызстан радиосунун таңкы эфиринде маек куруп жатып билдирди.
Анын айтымында, кийинки учурларда футболго жакын ата-энелердин жаңы мууну чыга келди.
"Футболдун келечегине татыктуу муун өсүп келе жатат. Ар бир позиция, коргонуу, орто бөлүк, чабуулга жок дегенде 2-3төн бала бар. Алар жергиликтүү топ-лигадан, чет өлкөдө ойноп жүргөн өспүрүмдөр арасынан чыгат. Мисалы, Испанияда ойноп жүргөн Эрболдун мууну футболдо чоң секирик жасашы мүмкүн. Азыр биз билген, билбеген канчалаган балдар чет элде ойноп, тажрыйба топтоп жүрүшөт. Футболго кызыккан ата-энелердин мууну дагы чыга келди", — деди Абдуллаев.
Ал ошондой эле жакынкы келечекте Кыргызстан курама командасы дүйнөлүк чемпионатка жолдомо алып каларына чоң ишеним артып жаткандыгын кошумчалады.
