Иштеген адамдын бир айлык акысынын 27,25 пайызы камсыздандыруу төгүмдөрүнө чегерилет. Бул тууралуу Нуржан Урустамова Sputnik Кыргызстан радиосунун таңкы эфиринде маек куруп жатып билдирди.
Анын айтымында, ал төлөмдүн 17,25 пайызын иш берүүчү төлөсө, калган пайызы иштеген адамдын айлык акысынан кармалып калат.
"Адам иштей баштаганда ал камсыздандыруу төлөмдөрүн жүргүзөт. Ал төгүмдөрдү жүргүзүү менен адам пенсиясын топтойт. Төгүмдөр жеке ишкерлик кылгандар, жалданып иштегендер үчүн милдеттүү болуп саналат. Мекемеде жалданып иштеген адам үчүн анын тарифи айлык маянадан 27,25 пайызын түзөт. Анын ичинде 17,25 пайызды иш берүүчү төлөсө, калганы жумушчудан кармалат. Учурда өлкөдө 1,5 миллион адам камсыздандыруу төлөмдөрүн төлөйт. Анын 600 миңи юридикалык жактан жалданма болуп иштеген жарандар. Басымдуу бөлүгүн жер үлүшү бар дыйкан чарбалар түзөт. Ошондой эле он пайызынан ашпаганын жеке ишкерлер төлөйт. Ушул жылдын 15-январынан тартып камсыздандыруу төлөмдөрүн кабыл алуу салык кызматына өттү. Мунун негизги максаты — ишкерликке ыңгайлуу шарттарды түзүү", — деди Урустамова.
Ошондой эле ал камсыздандыруу төгүмдөрүн кабыл алуу Салык кызматынын карамагына өткөнү менен тарифтер өзгөрүүсүз каларын кошумчалады.
