Бүгүн, 10-январда, кафенин тосмосун жана бастырмасын алып салуу үчүн барганда ортодо чыр чыкты.
Аллея курула турган аймакка Ош шаардык муниципалдык менчик башкармалыгынын кызматкерлери укук коргоо органдарынын өкүлдөрү менен барып, эскертүүлөргө баш ийбеген адамдардын объектилерин түрттүрүп жатканын калаа мэриясынын маалымат кызматы билдирди.
"Алгач кафенин жетекчилиги чектен өтүп кеткен курулушту түрттүрүүгө баргандарга каршылык көрсөттү. Аларга мурда эскертүү берилгенине карабай, өздөрү алып салышкан эмес. Түрттүрүү иштери эртең да уланат. Аллея курула турган жерге мыйзамсыз орнотулган 85 чакан соода түйүнү алып салынат", — дешти мэриядан.
Курула турган сейил бактын узундугу 850, туурасы 20 метр болмокчу. Мэрия курулуш иштери быйыл күзгө чейин бүтөрүн айтып, ага 30 миллион сомго жакын каражат керектелерин билдирди.
