БИШКЕК, 3-янв. — Sputnik. Балыкчыда травматикалык куралдан ок атылып, 36 жаштагы киши жабыркаганын Ысык-Көл облустук милициянын маалымат кызматы кабарлады.
Билдирүүгө ылайык, 2-январь күнү Балыкчы милициясына шаардык ооруканадан ок жеген адамдын түшкөнү тууралуу маалымат келген. Бейтап кайра жандандыруу бөлүмүнө жаткырылган.
Милиция кызматкерлери андан жарым саат мурун жабырлануучу дүкөндөрдүн бирине кирип, ал жактан Ж. аттуу бир адам менен жолукканын аныктап чыгышкан. Экөө айтыша кетип (тергөөнүн кызыкчылыгы үчүн уруштун себеби айтылбайт), соңунда Ж. травматикалык куралдан жүрөк тушка ок чыгарып, андан кийин из жашырып кеткен.
Окуя болгон жерди тинтүүдөн кийин 45 RUBBER үлгүсүндөгү травматикалык тапанчанын огу табылган. Бардык тийиштүү экспертизалар дайындалды.
Шектүүнүн аты-жөнү такталганы менен азырынча колго түшүрүлө элек.
Аталган фактылардын негизинде Кылмыш-жаза кодексинин 266-беренесинин 2-пункту ("Ок атуучу, газ же травматикалык куралды пайдалануу менен жасалган бейбаштык") негизинде иш козголуп, сотко чейинки иликтөө башталды.
