ОШ, 13-ноя. – Sputnik. Ош шаарында Mercedes Benz унаасын башкарып бараткан айдоочу жол кырсыгына кабылып, эки адам каза болду. Бул тууралуу облустук жол кыймылы коопсуздугун камсыздоо бөлүмүнөн кабарлашты.
Ага ылайык, окуя 12-ноябрь күнү саат 16:00дөр чамасында болгон.
"Калаадагы Рысбай Абдыкадыров көчөсүндө Ала-Бука районунун 20 жаштагы тургуну айдап бараткан унаа даракты сүзүп, оодарылып кеткен. Анын кесепетинен 18 жаштагы жүргүнчү кыз окуя болгон жерде каза болгон. Ал эми айдоочу Ош шаардык ооруканасынын жандандыруу бөлүмүнө жеткирилген. Бирок оор жаракатынан улам өзүнө келбей көз жумду. Кырсык катталган учурда айдоочу мас абалда болгондугу аныкталды", — деп айтылат маалыматта.
Кырсыкка кабылган унаа маркумдун тааныш агасына таандык болгон. Учурда бул факты боюнча тиешелүү экспертизалар дайындалып, тергөө иштери жүргүзүлүп жатат.
