БИШКЕК, 6-ноя. — Sputnik. Бишкек — Торугарт жолунда унаа коюп кеткен бир адам каза болду. Бул тууралуу Чүй ОИИББден маалымдашты.
Жол кырсыгы Токмок шаарынын аймагында 5-ноябрь күнү саат 21.45тер чамасында болгон. Каза болгон кишинин тек-жайы тактала элек. Милиция маркумдун ким экенин аныктоо үчүн сүрөтүн жарыялады.
"Каза болгон киши 35-40 жаш чамасындагы европа тегиндеги киши. Бою 165-170 сантиметр, чачы күрөң түстө, дене түзүлүшү орточо. Көгүш түстөгү жинсы, ак футболка жана кара тапичке кийип жүргөн", — деп айтылат маалыматта.
Маркумду тааныгандар Токмок ИИБине 0(313) 86-31-02, 0(701) 03-10-38 номурлары аркылуу же 102 кызматына кабарлап койсо болот.
