БИШКЕК, 6-ноя. — Sputnik. Эмгек жана социалдык өнүктүрүү министрлигинде жетекчинин жаңы орун басарлары дайындалды. Бул тууралуу өкмөттүн маалымат кызматынан кабарлашты.
Премьер-министр Мухаммедкалый Абылгазиевдин жарлыгына ылыйык, эми аталган кызматтарды Ализа Солтонбекова, Камалдин Токтосартов жана Жаңыл Алыбаева аркалайт.
Буга чейин Эмгек жана социалдык өнүктүрүү министрлигинин жетекчилиги кызматтан четтетилген. 22-сентябрь күнү Сеулдан (Түштүк Корея) Алматыга уча турган аба каттамдагы чуудан кийин министрдин орун басары Зууракан Каденова кызматтан айдалган. Таалайкүл Исакунова менен Лунара Мамытова эл өкүлү Аида Касымалиеванын айыптоолорунан кийин кызматтан алынган. Ал эми Жылдыз Полотова болсо өз эрки менен кызматтан кетүү тууралуу арыз жазган.
Министрликтин жетекчиси болуп Улукбек Кочкоров дайындалган.
