БИШКЕК, 26-cен. — Sputnik. Бишкек шаардык соту Бажы кызматынын төрагасынын мурдагы орун басары Райым Матраимовдун доосу боюнча өкмөттүн апелляциялык арызын карады. Бул туурасында Жогорку соттун маалымат кызматынан билдиришти.
Ага ылайык экс-бажычынын иши боюнча бүгүн, 26-сентябрда биринчи сот отуруму болуп, материалдардын жетишсиздигине байланыштуу кийинки айга жылдырылган.
"Райым Матраимовдун иши боюнча Шаардык сотто бүгүн биринчи отурум болду. Тийиштүү документтердин жетишсиздигинен улам 30-октябрга жылдырылды", — деп айтылат маалыматта.
Эскерте кетсек, Райым Матраимов өткөн жылдын 23-ноябрында ошол кездеги премьер-министр Сапар Исаков Мамлекеттик бажы кызматынын жетекчисинин орун басары "ишенимден чыкты" деген жүйө менен аны кызматтан алган. Кийин Исаков премьерликтен кеткенден кийин Матраимов "негизсиз иштен алынганын" айтып, өкмөттү сотко берген. Ал соттон кайра мурунку кызматына турууну суранган болчу.
25-июлда Биринчи Май райондук соту Матраимовдун доосун канааттандырган. Бирок өкмөт соттун чечими менен макул эместигин билдирип жогорку инстанцияга даттанган.
