БИШКЕК, 17-сен. — Sputnik. Россиялык опера ырчысы Михаил Луконин жол кырсыгынан каза болгонун кесиптеши Владимир Самсонов өзүнүн Facebook баракчасына жазды.
Анын айтымында, каргашалуу окуя 16-сентябрь күнү Санкт-Петербург шаарында болгон.
Айрым ЖМКлардын жазганына караганда, Луконин автосу менен жолдун кесилишинде турганда ага жүк ташуучу унаа келип урунган.
Ал эми РЕН ТВ каналы кырсык болгон учурдун видеосун жарыялады. Анда көрүнүп тургандай, жүк ташуучу унаа бир нече жеңил автону сүзүп өтөт.
Михаил Лукониндин репертуарында сегиз тилде 800 чыгармасы болгон. Ал бир нече жыл мурун "Грэмми"сыйлыгына көрсөтүлгөн. Ырчынын артында бир кызы калды.
