Көчмөндөр оюндары кайсы өлкөдө өтпөсүн Кыргызстандын бренди бойдон калат. Бул тууралуу Алтынбек Максутов Sputnik Кыргызстан радиосунун таңкы эфиринде маек куруп жатып билдирди.
Анын айтымында, Көчмөндөр оюндарынын башка өлкөгө өткөрүлүп берилгендиги жада калса чет элдиктердин да ичин ачыштырган.
"Мага чет мамлекеттен келген өкүлдөр, айрыкча Россиянын жарандары "ушундай чоң иш-чараны даярдап анан башка өлкөгө өткөрүп берип жатканыңарга ичибиз ачышып жатат. Оюндар Кыргызстандын брэнди болуп калды эле" деген ойлорун билдиришти. Бирок Көчмөндөр оюндары кайсы өлкөдө өтпөсүн Кыргызстандын бренди бойдон калат деп ойлойм. Дүйнөлүк оюндар болгондон кийин дүйнөнү кыдырып чыгышы керек", — деди Максутов.
Ал Көчмөндөр оюндарын сахналаштырууга үч ай даярдык көрүлгөндүгүн кошумчалады.
