БИШКЕК, 15-сен. — Sputnik. Бишкек шаарындагы Ички иштер башкармалыгы менен борбор калаанын райондук милиция бөлүмдөрү бүгүн, 15-сентябрда, ишембиликке чыкты. Бул туурасында шаардык милициянын маалымат кызматынан кабарлашты.
Анда бардык бөлүмдөрдүн кызматкерлери менен жетекчилик курам да шаарды тазалоо иштерине катышкандыгы айтылат.
Бүгүнкү ишембиликке борбор калаадагы башка министрлик менен ведомстволордун өкүлдөрү, муниципалдык кызматта иштегендер да чыкты.
ӨКМчилер Бишкекте Чоң Чүй каналынын нугун тазаласа, Ош калаасында аталган министрликке караган аймактарды тазалашты. Саламаттык сактоо министрлигинин кызматкерлери Юлиус Фучик атындагы паркты таштандылардан, желим бөтөлкөлөрдөн арылткан. Андан сырткары, бейтапкана менен ооруканалардын тегерек-четин тазалаган.
Дубандарда да бул демилге колго алынган. Өкмөттүн Нарын облусундагы өкүлчүлүгү жана жашоочулар, жаштар да ишембилик өткөргөндүгүн маалымат кызматы социалдык тармакка жарыялады.
Буга кошумча Ош шаарынын күнүнө карата шаар мэри Таалайбек Сарыбашовдун демилгеси менен массалык ишембилик болуп, ага муниципалитеттин кызматкерлери, шаардагы спортчулар, машыктыруучулар Сулайман-Тоону тазалаган.
Бул күнү ишембиликке президент Сооронбай Жээнбеков жана калаа башчысы Азиз Суракматов да чыкты.
