Sputnik Кыргызстан агенттиги Көчмөндөрдүн дүйнөлүк III оюндарын даярдоо жана өткөрүү боюнча катчылыгы, Жаштар иши, дене тарбия жана спорт агенттиги менен биргеликте спортчулар күч сынашчу мелдеш түрлөрүнүн эрежелерин даярдоодо. Бул ирет ссирым менен тааныштырабыз.
Сатба балбандын белине жана оң санына оролуп байланат. Балбандар борбордук аянтта тизелеп отуруп сол колу менен атаандашынын санына оролгон курду, оң колу менен белине байланган курду кармайт. Андан соң кармаган тейде тик туруп күрөштү баштоо белгисин күтүшөт. Жеңишке жетүү үчүн каршылашын денесинин бир бөлүгүн жерге тийгизиш керек.
Ссирым япондордун сумосунан айырмаланып атаандашын күрөш аянтчасынан түртүп чыгарса утуш берилбей, кайра кармаш уланат.
Беттеш эки раунд менен өтөт. Кармашууга эки, тыныгууга бир мүнөт убакыт берилет. Жаракат алган спортчу эки мүнөттүн ичинде медициналык жардам алып, килемге кайтышы керек.
Ссирымда согуу, бутка тебүү, муундарга тебүү ыкмаларын колдонууга тыюу салынат. Ал эми саны, колу жана буту менен жасалган ыкмаларга уруксат берилет. Ошол эле учурда кол менен бутту кармоого болбойт. Балбан курдан тартып гана каршылашын багындырыш керек.
Дүйнөлүк көчмөндөрдүн III оюндары 2018-жылдын 2-сентябрында Чолпон-Ата шаарындагы ат майданда башталат. Мелдештин курамына спорттун 37 түрү кирип, 79 өлкөнүн 2300 спортчусу күч сынашмай болду. Спорттун түрлөрүнө 15 мамлекеттин улуттук оюндары киргизилген.
