Sputnik Кыргызстан агенттиги Көчмөндөрдүн дүйнөлүк III оюндарын даярдоо жана өткөрүү боюнча катчылыгы, Жаштар иши, дене тарбия жана спорт агенттиги менен биргеликте спортчулар күч сынашчу мелдеш түрлөрүнүн эрежелерин даярдоодо. Бул ирет өзбектердин курашы менен тааныштырабыз.
Жалпы эреже
Мелдеш олимпиадалык система боюнча өткөрүлөт. Эки балбан бири-бири менен дзюдодогу татами маттын үстүндө тик туруп гана күрөшөт. Жаткан абалда кармашууга жол берилбейт. Ыргытуулар калыстар тарабынан бааланат. Экөө тең бирдей упай топтосо, жеңиш акыркы упайды камсыздаган балбанга ыйгарылат. Спортчу айып баа алган учурда атаандашына упай жазылат. Көчмөндөрдүн дүйнөлүк III оюндарында мелдеш эркектер арасында өткөрүлөт. Кармашууга 4 мүнөттүк убакыт берилет.
Балбандардын кийимдери
Мелдештин катышуучулары көк же жашыл түстөгү яхтак (кимано сыяктуу өзбектердин улуттук кийими), ак түстөгү шым кийип, кызыл түстөгү кур байланат.
Яхтактын узундугу тизеден 10-15 сантиметр жогору болот. Курдун эки учу толук эки айланып байлагандан кийин 20 сантиметрге ашып турушу керек, яхтактын жеңи билекке 5 сантиметр, багалеги томукка 10-15 сантиметр жетпей турушу керек. Курунун туурасы 4-5 сантиметр жана кызыл түстө болушу керек. Бутуна эч нерсе кийбей жылаңайлак чыгышат.
Тыюу салынган аракеттер
— Атаандышынын шымынан кармоого;
— Травма, балбандардын өмүрүнө коркунуч жараткан техникалык ыкмаларды колдонууга;
— Оор ыкмаларды колдонууга.
Дүйнөлүк көчмөндөрдүн III оюндары 2018-жылдын 2-сентябрында Чолпон-Ата шаарындагы ат майданда башталат. Мелдештин курамына спорттун 37 түрү кирип, анын жол-жобосу 104 өлкөгө жиберилген. Спорттун түрлөрүнө 15 мамлекеттин улуттук оюндары киргизилген.
