БИШКЕК, 22-авг. — Sputnik. Азия оюндарында грек-рим күрөшүнөн кыргызстандык балбан Акжол Махмудов алгачкы атаандашын жеңди.
Махмудов 77 килограмм салмак категориясы боюнча чыгып, 30 жаштагы кореялык Ким Хен У аттуу спортчуну 7:3 эсебинде утуп алды. КР спортчусунун каршылашы Олимпиада чемпиону (2012-жыл) жана Рио Олимпиадасынын коло медаль ээси. Мындан сырткары, дүйнөнүн бир жолку, Азиянын беш жолку чемпиону.
Бирок ага карабай кыргызстандык балбан жеңишти камсыздай алды. Башында атаандашы чабал аракет көргөнү үчүн партер берилгенде Акжол аны көтөрүп ыргытууга жетишти. Ошол учурда кореялык спортчу да чабуул жасай коюп эсеп саны 3:2 болуп калды. Экинчи бөлүктө Акжолго партер берилди. Аны каршылашы көтөргөндө кайра өзүн жыгып коюп эки упай алды. Андан соң дагы бир ыкма жасоого үлгүрүп артына өтүп кетти. Натыйжада 7:3 эсеби менен утуп чейрек финалга өттү.
