ОШ, 16-авг. – Sputnik. Араван районунда Жаңы-Жер чек ара заставасынын жаңы курулган имараты пайдаланууга берилди. Бул тууралуу Мамлекеттик Чек ара кызматынын Ош облусу боюнча башкармалыгынын башчысы Илгиз Талипов билдирди.
Иш-чарага өлкө башчысы Сооронбай Жээнбеков, өкмөттүн Оштогу өкүлү Узарбек Жылкыбаев баштаган топ жана чек ара заставасынын өкүлдөрү катышты.
Президент өз сөзүндө Өзбекстан менен чек ара маселеси 85 пайызга такталганын айтты.
"Мен өкмөттүн Ош облусундагы өкүлү болуп турганда бул застава бала бакчанын имаратында болчу. Себеби өзүнүкү жок эле. Эми жаңы имарат курулуп, ишке берилгенине абдан кубанып жатам. Буга каржылык колдоо көрсөткөн Владимир Путинге ыраазычылык билдирем", — деди президент.
Ал ошондой эле коңшу өлкөлөр менен болгон мамиле бекемделип жатканын белгиледи.
Белгилей кетсек, Жаңы-Жер чек ара заставасы жайгашкан аймак Өзбекстандын Андижан облусунун Булак Башы району менен чектешкен. Аталган застава 1999-жылдан бери бала бакчанын эски имаратында иш жүргүзүп келген.
